so kann ma a sagn, daß ma ebban mog.!.!.!

Wos is blos los mit mir, oda wenn di s´Herz durchanad bringt

Wos is blos los mit mir,
mir is so hoaß, und trotzdem moan i, dass i frier?
Heut is nix a so wia sunst,
bei dem Weda war des a koa Kunst.

Doch hat des wirklich was mit´m Weda z´doan,
bin i leicht karank woarn?
Übers ganze G´sicht kann i lacha,
und manchmoi duad me a wos traurig macha.

Lustig bin I, tanz druch d´Stumm,
und dann draht se alles wieda um.
De Brust wird eng, ois schnürt´s ma ab,
ob i vielleicht an Virus hab?

Hab ma scho denkt, i sollt zum Doktor geh,
weil mir oft des Schnaufa duad so weh.
Doch ob der da wos find´n dad,
bis i bei eam bin, hat se eh wieder ois um´drahd.

Dann is, dass i wieder so vui Glück verspühr
ois bumpad und ois hupft in mir.
Als dad mir glei außaspinga des Herz ,
ja, und des is weiß Gott koa Scherz.

Des nimmt me dann so mit, des G´fühl,
so schne, dass i´s nimma missen will.
Blos woas i no ned wo des is her,
Es is so guad und trotzdem schwer.

Wos hat de Krankheit für an Grund?
I spekulier scha Stund um Stund,
doch i kimm af hoan Nenna,
ebba duast de du da auskenna?

Kannst ma du sag´n woher der Zuastand rührt,
wenn ma af oamoi so verspührt?
Es is traumhaft sche, und i möchte´s a gar nimma missen,
I mog di so, und des sollst wissen.


17.03.2010 20:13:12

Guade Freind.....

Guade Freund sann wos Schens, oda wos ma von an guadn Freund spürt.

Manch moi fühlt ma se alloa und schwa,
ma is dadruckt, ohne Antrieb, einfach laa´.
Brauchst ebban zum reden, doch da is koana,
mechst de an ana vertrauten Schulter auswoana.

Hast Stoana auf deim Herzen,
oda bist plagt mit große Schmerzen.
Hast a Problem, und woast ned wo aus und wo a´,
Stehst manchmal an ana Mauer dra´.

Da is dann guad, wenns´d da hoin kannst wo an frischen Muad.
Des duad dann so unendlich guad.
Wenns´d ebban host, der für di is da,
egal ob Frau oda Ma´.

Ebban hoid, der zu dir steht,
und di a amoi fragt, wia´s da geht.
Einfach ebban, dems´d vertraust,
oda ebban, dems´d gern in´d Aug´n schaust.

Ebba, der de in Oam nimmt und trest,
oda a feiert mit dir a groß Fest.
Oan zu bledln und zum lacha,
spinna und Grampf macha.

Oba a ebban zum aloana,
zum Herz ausschütten und zum auswoana.
Ebban, wos´d woast, der di ned hint lasst.
Ebban, wos´d woast, daß´d heut sonst nix verpasst.

Oba a ebban zu dischgriern,
zum plowan und zum philosophier´n.
Zum Gedanken austauschen,
oda einfach nur ebban zum plausch´n.

Ebban, der da hilft, wenns´d a moi brauchst a dritte oda vierte Hand,
ebban, der die auffangt, wenns´d fallst vom Rand.
Ebban, der spontan zu dir sagt, i land di ei,
nimm a guade Laune mit, und kimm vorbei.

Ebban, wos´d merkst, das er an di denkt,
und mit dir de Schicksal manch moi umi lenkt.
Ebban, der di fragt, wos machst denn heut alloa?
I hätt wos mit dir voa.

Ebban, af dens´d di verlass´n kannst,
der ei´springt, wenns´d di a mal verplanst.
Ebban, der dir sagt, dass er di mag,
und zu dir steht a in schlechte Tag.

Wenns´d jetz ebban kennst, der des für di is,
mei Freund dann sei da´s g´wiß,
des is a Freund, und du woast, wia sche des is.

An guadn Freun find´ ma ned leicht,
und ma muaß scho a wengl aufpass´n, dass er si´ ned wieder schleicht.
A a Freundschaft hat seine Grenz´n,
wenn’s bricht, dann wird´s zum drenz´n.

Doch a Freundschaft lasst se durch nix ersetzen,
und fliang a manchmoi d´Fetzt´n,
Se raufan se schnell wieda zam,
Weil´s wissen, wos vo´ anada ham.


12.03.2010 15:55

D´Sehnsucht

D´Sehnsucht, oda wia hoat, dass i af Di woat!

I denk´ an Di´ von früh bis spaht,
schau auf d´Uhr, wia se da Zoaga draht.
Vui z´lang is mir ohne Di de Zeit,
i hab a Herz, des se af Di g´freut.

Doch is na ned so weit,
der Tag vergeht wieder gar ned heut.
Kann me af gar nix konzentrier´n,
duast ja Du mein Kopf verwirr´n.

Koane schlechten Sachan, na
Lauta schene Gedanke san ja da.
Ohne Di hab i a Not,
Ois is ohne Di so tot.

D´Stund´n san wia a ganza Tag
Manchmoi is des scha a Plag.
Wenn ma wart und im Ungewissen steht,
bis dann endlich de Tür aufgeht.

Dann bist kemma, bist dahoam,
iatz nimm i Di glei in mein Oam
und druck Di ganz fest her zu mir,
weil i Di ja so gern spühr´.

Lacha duats wieda iatz mei Herz,
und i sag Das echt, des is koa Scherz.
Bist mei Schneckal, bist mei Schatz,
einfach mei innigst geliebta Spatz.


Den i nimma geb´n mecht her,
wenn i dran denk, wird ma´s Herz ganz schwer.
I mag Di und i brauch Di do´,
mach ma s´Beste draus, daß´s bleibt a so.


29.01.2010 13:12

S´Alloa sa.

S´Aloa sa´ , oda wenn da Deck af´n Kopf fallt.


Wenns´d auf stehst in da fria,
dann is ois laa´ bei dia.
Neamd is da, neamd mocht an Krach.
D´Stimmung is manchmoi a recht flach.

Segst koa lochads Gsicht nem dia,
machmoi kimmt ma se scho bled fia.
Dad ja so guad, wenn ma schau kannt in zwoa Äugal,
von am liab´n Weibal.

Nix riad se, ois is staad,
Is heut de ganze Welt vordraht?
Na, es is scho ois richtig, so wias is,
bist blos aloa, und des is g´wieß.

Kimmst da vor, wia eigsperrt in de eigena vier Wänd,
Deck kimmt owa, drucka duads ent und herent.
Drahst de zum Telefon um,
owa a des bleibt stumm.

Iatz kannt i sogn, segs positiv, dann host die rua,
doch zum z´frien sa g´hört a a Dischkurs da zua.
S´alloa sa is schee,
Owa alloa an Himme drom, dad des geh´?

Dann steht ma wieda vorm Fensta und duad bloß auße schaun,
und manchmoi glaubt ma, dass eam de Gedanken fast vostaum.
Nix passiert, ma duad bloß woat´n, dass wos passiert.
Oft lebts sa se gar ned leicht alloa und ungeniert.

Geht da nix aufa, woast ned wos sollst fanga a´.
Alloa sa is wos, des ned jeda ka´.
Doch oft muas ma sa alloa,
wenn’s a hoart is wia a Stoa.

Doch da muaß ma durch, weils nix bringt,
kemmand a wieda Tog, wo des Vogal wieda a Liadl singt.
De Sonn wieder hoch steht am Firmament,
und dir a Herzenswärme schenkt.

Drum laß ma a an Kopf ned hänga,
und doa ma nimma Trübsalbalsen länga.
Mir akzeptiern den Dog, und a de Stund,
und suachan nimma länger noch an Grund.

Da Mensch denkt, und Gott lenkt.
Doch de schönsten Zeiten ma oft selber voschenkt.
Jeda Tog is wert, dass man lebt und liebt,
und des segt, wos des Leb´n schönes gibt.

02.04.2010 15:40

Melancholies

Melancholies, oda wenn oan ned a so is, wia eam sa´soll´.


Mei war Gestan no ois schee,
war i guad draf, ja so kenn´ a me.
Doch heut is ois a wengl anders worn.
Suacht me ebba s´Schicksal hoam?

De ganze guade Stimmung is dahi´,
des bin doch momentan ned i?
Miad bist, an Drell lost´d hänga,
S´G´sicht wird a oiwei länga.

Daschlogn bist, koa Locha bringst auf d´Lipp´n,
sollt´ jetzt de ganze guade Laune kipp´n?
Im Hirnkastl marternd di Gedank´n.
Des ganz Gefüge kimmt ins wank´n.

Mag mag ned red´n und a ned lacha,
A´ is oan ned noch Grampf macha.
Zuag´sperrt is Maul und a des Herz,
Diaf drinn spührst an bled´n Schmerz.

Doch woher is des iatz af oamoi a so,
hat da leicht ebba wos do´?
Hat de wer krengt, oda beleidigt,
oda war einfach de Stund no ned ganz zeitig?

Is da wos üwa ´d Leba glaufa
Oda warst zu fest beim Saufa?
Host wos foisch dawischt zum ess´n,
oda host blos des Koppalmacha vergess´n?

Host wos dabei g´habt gester, wos hätts loss´n soll´n dahoam?
Und es is doch a neamd g´sorm,
dass dir de Letsch´n heut a so owi hängt,
ja sog´amoi, bist heut beschrenckt?

Hamma ebba a wengl dedaletschad heut?
Ha, sog, dass de heut gar nix g´freid?
So kenn i di ja gar ned, des bist doch ned Du?
So sitzt er da, sogt ned gick, ned gack und a ned muh.

Af oamoi war hoid heut alles anders.
Wart´s, a bissl dauarts no, dann g´spannt er´s.
Daß gar neamd wos kann dafia,
dass er se selber steht in seina Tia.


Hamma veileicht a bißl viel erwart von am gestrig´n Dog?
Is ned eintret´n, wos´d da vorg´stellt hast? Aha, des is dei Plog.
Und grad des is ned woa,
weilst da blos selba machst wos vor.



Moch deine Aug´n af und geh auße bei da Tia,
nimm den mit, der drin steht, weil der is Schuld dafia.
Geh wieda eina, und lass´n draust,
und wenn er wieda kimmt, dann zoag eam d´Faust.

Den brauch ma ned, den hamma dick,
wenn er se wieda umawicklt um an Hois, so wia a Strick.
Er soll se schleicha, und kemma braucht er nimma,
möchst do´ ned, dass werd wieda schlimma.

Denn nur der is schuid an deim Befind´n,
sog eam af, und laß´n vo´schwind´n.
Du bist du, und sonst zählt nix,
stell de dageg´n und gib eam Strix.

Hau´ eam aus, af nimma wieda kehr,
sog eam, du g´hörst do gar ned her.
Leb dei Leb´n, und moch da nix mehr via,
leb a so, dass imma offa bleibt, de Tür.

Dann kannst a wieda locha
Und mit deine Freund Spaßettl mocha.
Du bist doch der, der oiwei locha ka,
und mit seim locha gern de andern steckt a´.

29.03.2010 15:08